20 августа 2014 г.
ИРТНĔ эрне кун, каçхи 11 сехет тĕлĕнче, Патăрьелĕнчи Олег Кошевой урамĕнчи Трофимовсен хуçалăхĕнче пушар тухнă. Юрать-ха, çакна кỹршисем çийĕнчех асăрхаса пушар хуралне пĕлтернĕ. "01" служба ĕçченĕсем васкавлă пулăшупа вăхăтра çитнĕрен вут-çулăма сарăлма паман, çурта сыхласа хăварнă.
Районти пушар надзорĕнчен пĕлтернĕ тăрăх, инкек мĕнрен тухнине хальлĕхе пĕтĕмлетмен пулин те, çак çуртра эрех-сăрапа ашкăнса пурăнни куç умĕнчех : картишĕнче "фунфурик" кĕленчисем купалансах кайнă. Кил картинчех кăвайт чĕртсе апат хатĕрлени те пысăк хăрушлăх кăларса тăратать. Вут-кăварăн чĕлхи вăрăм теççĕ. Çавăнпа та вăл нимĕн те мар хуралтăсене ярса илме пултарать.
Источник: "Авангард" (газета Батыревского района)