13 сентября 2014 г.
РАЙОНТИ ЗАГС пайĕнчен пĕлтернĕ тăрăх, сентябрĕн 8-мĕшĕнче 350-мĕш ача çурални çинчен свидетельство панă. Хальхинче çак савăнăç Тутар Сăкăтĕнчи Растем Мавлетовичпа Зухра Азимовна Абитовсен çемйине çитнĕ. Икĕ хĕр хыççăн çемье йăхне тăсаканшăн епле савăнмăн. Çавăнпах пуль ĕнтĕ ывăла "Тахир" ят панă, урăхла вăл "таса та çылăхсăр чун" тенине пĕлтерет иккен.
ЗАГС ĕçченĕ Ольга Гусарова свидетельствăпа пĕрлех район администраци пуçлăхĕн саламне çемье пуçлăхне алла тыттарнă. Сăмах май каласан, пĕлтĕр районта 350-мĕш пепке юпа уйăхĕн 3-мĕшĕнче çуралнă. Кăçал, пĕлтĕрхи çак вăхăтпа танлаштарсан 30 ача ытларах кун çути курнă.
Источник: "Авангард" (газета Батыревского района)