06 февраля 2013 г.
РФ Пенси фончĕн республикăри уйрăмĕ пĕлтернĕ тăрăх – Раççей Федерацийĕн Правительствин 2013 çулхи кăрлачăн 23-мĕшĕнчи 26-мĕш йышăнăвĕпе ватлăхри ĕç, инвалидлăх тата тăрантарса пурăнакана çухатнăшăн паракан пенсисене 6,6 процент ÿстернĕ.
Чăваш республикинче вĕсем 320 пин çыннăн пысăкланнă. Хушăм кашни çыннăн – хăйне май, çакă пенси виçипе çыхăннă.
Ÿсĕм хыççăн пирĕн хутлăхра ватлăхри ĕç пенсийĕсем вăтамран 570 тенкĕ хăпарса 9325 тенке çитнĕ. Вĕсене тивĕçлĕ канăва тухнисен 84 проценчĕ илсе тăрать.
Чăваш Енре пенси тÿлемешкĕн уйăхсерен каякан тăкак нарăс уйăхĕнче182 млн тенкĕлĕх нумайланса 3,1 млрд тенкĕрен иртет.
Ĕç пенсийĕсене çулленех инфляцие тĕпе хурса индексацилеççĕ. Черетлĕ ÿсĕме 2013 çулхи ака уйăхĕн 1-мĕшĕнче ирттерме палăртнă. Ун чухне социаллă пенсисене, федераци çăмăллăхçисен уйăхри укçа тÿлевне тата социаллă пулăшу пуххин хакне те пысăклатаççĕ.
В. ИЛЬИНА.