29 октября 2014 г.
ШĂКĂЛ-ШĂКĂЛ калаçса, килĕштерсе пурăнакан кирек мĕнле çемье те çукран пур тума, мĕн пуррине перекетлеме, пурнăçа сыпăнтарса пыма меслечĕсене шырать. Хушшипе хура кушак чупса иртсен вара ыррине кĕтме хĕн. Ун пек чухне çăвартан усал сăмах тухасси те, кил-тĕрешре чашăк-тирĕк шакăртасси те паллă. Çĕнĕ Ахпỹртри çак мăшăрăн та çаплах пулса тухнă. Нумай пулмасть çеç тимĕр решетке леш енчен тухса килнĕ хуçа судпах уйăрăлнă арăмĕпе тем уйăрайман-пайлайман: хирĕçнĕ, çапăçнă, кăшкăрашнă... Юлашкинчен арçын аллине шăрпăк тытнă та хуралтине тивертсе янă. Юрать-ха, ĕç-пуçĕ кăнтăрла пулнă. Çынсем тĕтĕм йăсăрланнине çийĕнчех асăрханă. Унсăрăн шартлама сивĕ хĕл умĕн çара çĕр çине те тăрса юлăн...
Источник: "Авангард" (газета Батыревского района)