06 декабря 2014 г.
КУ ЧУХНЕ эпир вырăс чĕлхипе, математикăпа, историпе е тата ытти предметсемпе районта олимпиадăсем йĕркеленине хăнăхнă темелле. Анчах та çамрăксем хушшинчи право культурине мĕнле пĕлнине тĕрĕслекен ăмăрту час-час пулманнине йышăнмаллах. Хальхинче "Эпĕ _ Раççей гражданинĕ" олимпиадăна районти территори суйлав комиссийĕпе вĕренỹ пайĕ каварлашса йĕркеленĕ. Саккун йĕркине пĕлнипе çыхăннă тупăшăва 10 _ 11 классенчи 24 каччăпа хĕр хапăл тунă. Призлă вырăнсене вара Патăрьелĕнчи пĕрремĕш вăтам шкулти вĕренекенсем пайланă: пĕрремĕш вырăна 11б класри Татьяна Лекарева, иккĕмĕшне унпа пĕрле вĕренекен Надежда Каштанова, виççĕмĕшне вара 11а класри Гузель Мухутдинова. Çĕнтерỹçĕсен пĕрлештернĕ ушкăнĕ Раççей Федерацийĕн Конституцийĕн кунĕнче, декабрĕн 12-мĕшĕнче, тĕп хуламăрта йĕркелекен республика тупăшăвĕнче хăйсен çивĕч ăсне кăтартма тивĕ.
Источник: "Авангард" (газета Батыревского района)