10 декабря 2014 г.
ÇУЛ çинче инкексен шучĕ чактăр тесе ГИБДД ĕçчененĕсем тĕрлĕ мероприяти ирттерех тăраççĕ. Акă, декабрĕн 16-мĕшĕнче "Автобус" операци пулать.
Эрех-сăра ĕçсен руль умне ларма юраманни пирки ача садне çỹрекенсем те пĕлеççĕ, анчах аслисем "кикириккисене" усал шĕвекпе хĕртсен çакăн пирки манаççĕ. Вĕсене пула вара айăпсăр çынсем сусăрланаççĕ, ĕмĕрлĕхе куçĕсене хупаççĕ. Хĕрĕнкĕ шоферсене тытса чарас тĕллевпе декабрĕн 26-27-мĕшĕсенче "Ỹсĕр водитель" операци иртет.
Каникул вăхăтĕнче урамра ача-пăча туллиех. Вĕсем вара час-часах асăрханулăх пирки мансах çул çине чупса тухаççĕ. Хăш-пĕр чухне вылянине те курма пулать. Çул-йĕр инспекторĕсем водительсене хĕллехи вăрăм кану кунĕсенче тимлĕхе ытларах ỹстерме ыйтаççĕ. Çавăн пекех хăйсем те декабрĕн 25-мĕшĕнчен пуçласа 2015 çулхи январĕн 10-мĕшĕччен "Асăрханăр _ каникулсем!" операци йĕркелеççĕ.
Источник: "Авангард" (газета Батыревского района)