27 декабря 2014 г.
Нумай пулмасть Патăрьелĕнчи бизнеспа инкубатор базинче "100" таранах!"("На все "100!") çамрăксен форумĕ иртрĕ. Унта район администраци çу-мĕнчи Çамрăксен правительстви, депутатсен Пухăвĕ çумĕнчи Çамрăксен парламенчĕ, ял тăрăхĕсенчи тата организаци-предприятинчи яш-кĕрĕм хутшăнчĕ.
Форума райадминистрацин вĕрентỹ пайĕнчи çамрăксемпе ĕçлекен центр директорĕ А. Адикина уçрĕ. Вăл хăйĕн сăмахĕнче каччăсемпе хĕрсен аллинче пуласлăх иккенне палăртса хăварчĕ. Районта кăçал патшалăхăн çамрăксен политикине реализацилесси еплерех пынине пĕтĕмлетрĕ. Ял поселенийĕсенчи Çамрăксен канашĕсем Юхмапа Пăла тăрăхĕнче, республикăра йĕркеленĕ мероприятисене хутшăннин мониторингĕпе, кăтартăвĕсемпе паллаштарчĕ.
Бизнес-инкубатор директорĕ А. Ялуков центр ĕçĕ-хĕлĕ çинчен кĕскен каласа пачĕ. Хĕрсемпе каччăсене çитес çул ăнăçу, йывăрлăхсене çĕнтерме сунчĕ. Мероприятинче çавăн пекех
Çамрăксен правительствин председателĕ Ч. Ишмуратова, территоринчи суйлав комиссийĕ çумĕнчи Çамрăксен суйлав комиссийĕн членĕ Д. Федоськин тухса калаçрĕç. Çамрăксен правительствипе парламенчĕ "Хĕл Мучи академийĕ" проект хатĕрленĕ. Вăл пурнăçра йывăрлăха лекнĕ ачасене уявсем туса парассипе ĕçлет. Çамрăксемпе ĕçлекен центрăн методисчĕ А. Антонова шăпах çакăн пирки сăмах пуçарчĕ.
О. БЕЛЬДЕКОВА
Источник: "Авангард" (газета Батыревского района)