28 января 2015 г.
ТЕМИÇЕ кун каялла Шупашкар хулинчи Кăнтăр поселокĕнчи пĕр уйрăм кил-çуртра инкек пулса иртнĕ текен хыпара чылайăшĕ илтнĕ-тĕр. Ирхине тул çутăлнă-çутăлманах çак çуртра пушар тухнă. 31 çулхи хĕрарăм хăйĕн пĕчĕк пепкине вут-çулăм çавăрса илнĕ çуртран илсе тухса кỹршисене панă та ыттисене çăлма çунакан çурта каялла васкаса кĕнĕ. Шăп çав вăхăтра газ баллонĕ сирпĕнсе кайнă, çурт тăрри йăтăнса аннă...
Пушарниксем вут-кăвара сỹнтернĕ хыççăн инкек сиксе тухнă вырăнта 4 çыннăн ỹтне тупнă: 59 çулхи хĕрарăм тата унăн виçĕ хĕрĕ.
Çакнашкал синкерлĕх пурне те пурнăç, хăрушсăрлăх çине тимлĕх ытларах уйăрма хистет. Районти пушар надзорĕн инспекторĕсем хĕллехи вăхăтра вут-кăварпа уйрăмах асăрхануллă пулма ыйтаççĕ, юсавсăр электричество приборĕсемпе усă курма юраманнине тепĕр хут асăрхаттараççĕ.
Источник: "Авангард" (газета Батыревского района)