28 января 2015 г.
Професси ăсталăхне куллен туптаса, ỹстерсе пыма вырăнта çанă тавăрса çеç ĕçлени тепĕр чухне çителĕксĕр те. Тĕрлĕ конкурса хутшăнса хăв мĕн пĕлнине ыттисене кăтартма пултарни, çак системăра вăй хуракансен малта пыракан технологийĕсене вĕренме тăрăшни темрен те паха. Çапла тума тăрăшать те ĕнтĕ Патăрьелĕнчи агропромышленность техникумĕн директорĕн воспитани енĕпе ĕçлекен çумĕ И. Рубцова. Ку хутĕнче те çаплах пулчĕ. Конкурса професси системинчи вĕрентĕвĕн 20 участникĕ хутшăнчĕ. Вăл икĕ тапхăрпа иртрĕ. Малтанхинче конкурс материалĕсене тăратмалла пулчĕ, иккĕмĕшĕнче _ хỹтĕлемелле. Пĕтĕмлетĕве Шупашкарти строительство техникумĕнче турĕç. Наукăпа практика семинарĕнче И. Рубцова "Çамрăксене кăмăл-сипет, гражданла право тата патриотла воспитани парас ĕç" номинацире палăрчĕ.
А. ИВАНОВА
Источник: "Авангард" (газета Батыревского района)