16 февраля 2013 г.
Юхмапа Пăла тăрăхĕнче паллă спортсменсем ячĕпе тĕрлĕрен турнир йĕркелесси ырă йăлара. Çак кунсенче, сăмахран, Первомайскинчи Культура çуртĕнче ЧР тава тивĕçлĕ тренерĕ, ЧР тава тивĕçлĕ физкультурăпа спорт ĕçченĕ, Каншел чăвашĕ Владимир Семенов 55 çул тултарнă ятпа çамрăксем хушшинче ирĕклĕ майпа кĕрешессипе республикăри уçă турнир иртнĕ.
Спорт уявĕ пуçланиччен юбиляра район администрацийĕн пуçлăхĕ Николай Глухов, ЧР физкультурăпа спорт тата туризм министрĕ Сергей Мельников, Первомайски ял тăрăх пуçлăхĕ Владимир Секретов, пĕрлех Красноармейски, Канаш, Елчĕк, Шупашкар, Сĕнтĕрвăрри, Етĕрне, Çĕрпÿ район администрацийĕсен пуçлăхĕсем, кăнтăр районĕсен благочиннăйĕ Сергий протоиерей, юлташĕсемпе тăванĕсем саламланă, малашнехи ĕçре çитĕнÿ, пурнăçра çирĕп сывлăх суннă.
Хисеплĕ хăнасем хушшинче Раççей Геройĕ Николай Гаврилов генерал-лейтенант, Николай Сидоров генерал-майор, ирĕклĕ майпа кĕрешессипе тăватă хутчен тĕнче чемпионĕ пулнă Раççей тава тивĕçлĕ спорт мастерĕ Сергей Корнилаев тата ыттисем те пулнă. Республикăн спорт министрĕ ентеше “Раççей Федерацийĕн физкультурăпа спорт отличникĕ” паллă, район администрацийĕн пуçлăхĕ Хисеп грамоти парса чыс тунă.
В. Семеновăн спорт каçалăкĕнчи çитĕнĕвĕсем-шĕн савăнмалăх пур. Нумай ачаллă çемьере ÿснĕ Каншел каччи вăтăр çул тренер-преподавательте тăрăшнă. Çак сахал мар вăхăтра 40 ытла СССР тата Раççей спорт мастерĕсене хатĕрленĕ. Чăваш Республикинчи ирĕклĕ майпа кĕрешекенсен вице-президенчĕн хастарлăхĕпех Чăваш Енти чылай районсемпе хуласенче секцисем йĕркеленĕ.
(Хамăр корр).