15 апреля 2015 г.
Кĕçĕн ушкăнри ачасемпе ĕçленĕ май çитĕнекен ăрăва çамрăклах горшок (чỹлмек) çине лартма хăнăхтарасси те куллен туса пымалли ĕçсенчен пĕри тесе шутлатăп. Çак ыйту чылай ашшĕ-амăшне те канăç памастех. Иртерех хăнăхтаракан амăшĕсен сăлтавне те ăнланмалла. Йĕм çăвасси сахалланать е памперс тăхăнтартасси çук. Хăшĕсем вара пачах кая юлма тăрăшаççĕ. Çак ĕçе те вăхăтра, тĕллевлĕ пурнăçлани кирлĕ. Ача чỹлмек çине ларма ан хăратăр тесен мĕн тумалла-ха? Çакна вăл савăк кăмăллă чухне пуçăнмалла. Памперспа чылай вăхăт çỹрекен ывăл е хĕрача урăхла мелпе "тула тухмаллине" пĕлмессе те пултарать. Унăн кучĕ яланах типĕ. Мĕн сĕнесшĕн-ха çавăнпа? Ачана 6-7 уйăхран чỹлмек çине ларма хăнăхтарма тытăнмалла. Ун чухне вăл хăйне хăй кирек ăçта та çирĕппĕн ларма пултарать. Е тата шăрас килнĕ ача канăçсăрланать, пачах шăпланать, йăшкăшать тата ытти те. Каллех чỹлмек енне кăтартмалла. Вăл курăнакан вырăнтах тăмалла. Ачана унта çывăрма выртас умĕн е çывăрса тăрсан та лартма тăрăшмалла тата ытти те.
Чỹлмек çинче нумай тытни усăсăр. Вăл унран сивĕт-ме, канăçсăрлантарма пултарать. Ун пек чухне вăрçмалла та мар. Шăнă хыççăн вара лăпкаса илни те кирлĕ. Йĕмне йĕпетнĕшĕн те усал сăмах каласа вăрçмалла мар.. Ыррине, пĕчĕкскер, часах хăнăхаймĕ.
Мĕнлерех савăт шырамалла-ха? Пĕчĕкскер те чăтăмлă пултăр вăл. Кĕвĕ кăлараканни е ỹкерчĕксемли вылямалли теттене çаврăнма пултарать. Кресло е тенкел евĕрли те майлах мар.
Ача ỹстернĕ чухне чăтăмлăхпа тимлĕх сахал мар кирлĕ.
Л. ДОЛГОВА, Кивĕ Катекри ача сачĕн воспитателĕ
Источник: "Авангард" (газета Батыревского района)