16 мая 2015 г.
ĔНЕР Пĕтĕм тĕнчери çемье кунне паллă турăмăр. Календаре кĕртнĕ тĕрлĕ йышши уявсенчен çакă пĕлтерĕшлисенчен пĕри тесен те йăнăш мар. Мĕншĕн тесен эпир пурăнакан общество никĕсĕ шăпах çемьерен, вăл мĕнле воспитани илнинчен, ырă та кăтартуллă пулнинчен пуçланать. Тĕреклĕ те çирĕп çемьере çеç пысăк шанăç, малашлăх.
Сăмахăма çемье кунĕпе çыхăнтарнăран, районти ЗАГС пайĕн хăш-пĕр кăтартăвĕсене илсе парасшăн. Ака уйăхĕнче Юхмапа Пăла тăрăхĕнче 39 ача çут тĕнчене килнĕ. Кăтарту иртнĕ çулхи çак вăхăтрипе танлаштарсан пысăкрах пулни кăмăллă-ха. Вилекенсен йышĕ сахалланни те ырă пулăм. Анчах та ырă "аист" илсе килнĕ пепкесенчен çиччĕшĕн амăшĕсем ача ашшĕсемпе çырăнман. Урăхла каласан, тулли çемье мар темелле.
Источник: "Авангард" (газета Батыревского района)