08 июля 2015 г.
ÇУ КУНĔ чылай енĕпе илĕртỹллĕ пулин те асăрханмалли, сыхланмалли сăлтавĕсем сахал мар. Вĕсенчен пĕри _ палăртса çирĕплетмен вырăнта шыва кĕрсе инкек серепине çакланни. Республикипе илес пулсан кăçал иртнĕ çулхи çак вăхăтри кăтартуран 46 процент ытларах пăтăрмах çаврăнса тухнă. Çынсем шывра путса вилнĕ 24 тĕслĕхрен 90 проценчĕ эрех ĕçнипе çыхăннă. Паллă ĕнтĕ, хĕрĕнкĕ çыншăн тинĕс те ура пакăлчакĕ таран çеç. Июнĕн 26 _ 28-мĕшĕсенче çеç республикăра 8 çын шыв мăшкăлĕ пулса ĕмĕрлĕх куçне хупнă. Вăл шута икĕ ача çакланни тата ытларах пăшăрхантарать.
Инкек куçа курăнса килмест. Апла пулин те шыва кĕнĕ чухне мĕн пур йĕркене пăхăнсан, унтан айккинчен те пăрăнса иртме май пур.
Источник: "Авангард" (газета Батыревского района)