22 августа 2015 г.
Владимир Паймуллин, районти "Морское братство" пĕрлĕх членĕ: "Чăваш Ен Пуçлăхĕн тивĕçĕсене вăхăтлăха пурнăçлакан Михаил Игнатьев Шăнкăртамра Тăван çĕршывăн Аслă вăрçинче паттăрла пуç хунă, унтан таврăннă салтаксене, паян службăра тăраканнисене сума суса лартнă вертолет-палăка уçнă çĕре хутшăнни _ питĕ пысăк чыс. Пирĕн районта паяна тĕрлĕ çарта службăра тăнисем хăйсен вăйĕпе 5 палăк уçрĕç. Сăмах май, пуçарса яраканĕсенчен пĕри эпир _ тинĕс çар флотĕнче службăра тăнисем _ пултăмăр.
Михаил Васильевич хăйĕн сăмахĕнче çамрăксем хушшинче патриотлăха ỹстересси пирки те каларĕ. Эпир те яш-кĕрĕме тĕрĕс воспитани парассине вăйлатасси, вĕсене тĕрĕс çул суйласа илме пулăшасси пирки тăрăшатпăр. Акă, Патăрьелĕнчи пĕрремĕш вăтам шкулта кадет класĕсем уçма хутшăнтăмăр. Малтанах ашшĕ-амăшĕ хирĕçлеме пăхрĕ, эпир ырă шухăшпа хамăр ĕçе пуçарнине курса ĕненсен ырларĕç. Патриотлăх темине республика, Раççей шайĕнче тата ытларах тимлĕх уйăрмалла, ун чухне çитĕнỹсем те пулĕç".
Источник: "Авангард" (газета Батыревского района)