31 августа 2015 г.
Çак кунсенче Тутар Сăкĕтĕнче пурăнакан Бибихалиса Шарафутдинова та Раççей Президенчĕн ятарлă çырăвне алла илнĕ. 90 çул тултарнă тыл хастарне пĕлтерĕшлĕ юбилейпе саламлама район администраци пуçлăхĕн çумĕ _ вĕрентỹ, социаллă аталану, информаци тивĕçтерĕвĕпе архив ĕçĕсен пай пуçлăхĕ Валерий Осипов ертсе пыракан хисеплĕ ушкăн çитнĕ.
Бибихалиса Зиатдиновна ачаллах чире пула сусăррисен ушкăнне çакланнă. Апла пулин те вăл ĕмĕр тăрăшшĕпех тăван колхозра тăрăшнă. Пурнăç шăпи çапла çаврăнса тухнăран, вăл çур ĕмĕр ытла Минетулла пиччĕшĕн çемйинче хỹтлĕх тупнă. Кинемей чылай хура-шурне чăтса ирттернĕ пулин те, паянхи пурнăçшăн влаçа ертсе пыракансене тав тăвать, вăрăм ĕмĕршĕн вара хăйне пăхакан тăванĕсем умĕнче пуç таять. Вĕсем ăна çывăхран та çывăха хурса пăхаççĕ.
Источник: "Авангард" (газета Батыревского района)