13 марта 2013 г.
Хальхи вăхăтра Чăваш Ишек ялĕнче вырăнти депутат тивĕçне виççĕн пурнăçлаççĕ: А. Иванов, В. Цыпленкин тата А. Викторов. Халăх умĕнчи яваплă çынсем кашнийĕ тĕрлĕ вырăнта тăрăшать: пĕри – усламçă, тепри – водитель. Виççĕмĕшĕ вут-çулăмпа кĕрешекенсен коллективĕнче вăй хурать. Александр Викторов районти пушар чаçĕнче ĕçлеме пикенни вăтăр çул ĕнтĕ. Аслă пĕлÿллĕ шут ĕçченĕ хăйĕн стажне çырма бригадир-водительтен пикеннĕ. Каярахпа вара пай инженерĕ те, начальник та, караул пуçлăхĕн пулăшуçи те пулнă. Паян вăл – тăватă районшăн яваплă отрядăн тĕп инженерĕ. Ялта Кураков урамĕнче пурăнакансем пултаруллă та хастар çемье пуçлăхне иккĕмĕш хут хăйсен «тарçи» пулма шанаççĕ.
«Ĕçлĕхлĕ те тăрăшуллă, халăхшăн хыпса çунакан çын » – çапла хаклаççĕ ăна суйлавçăсем. Çак сăмахсене А. Викторов депутат сăпайлăн йышăнчĕ. «Пурнăçламаллисем сахал мар, пурте пысăк укçа-тенкĕпе çыхăннипе тăруках пулаймасть...» – хуравлать вăл. Ăна ял варринчи кĕпере çулсеренех тан тапса шыв илни пăшăрхантарать. Вăй çитнĕ таран ăна хăйех хăпартать, тăпрапа купалать. Шкул урамĕн вĕçĕпе масар еннелле каякан çула тирпейлесе тăрас пирки те унăн çĕнĕ шухăшсем пур.
А. Егорова.