26 декабря 2015 г.
ЮЛАШКИ вăхăтра наркăмăшлă эрехсемпе аптăранă çынсем пурнăçран уйрăлни, хавшаса юлни пирки тăтăшах илтме пулать. Патшалăх шайĕнче çĕкленĕ ыйту çивĕчлĕхĕ пирĕн районта та çук мар. Патăрьелĕнчи тĕп больницăна организмшăн тĕрлĕрен сиенлĕ хутăшсемлĕ эрех ĕçсе хавшаса çитнĕ пациентсем сахал мар лекеççĕ. Çĕнĕ çул праçникĕсенче çакнашкал тĕслĕхсем тата ытларах пулма та пултарĕç. Çавăнпа та уйрăм çынсен аллинчен е контрафактлă эрех туянса хăналанакансем ним те мар "03" служба ĕçченĕсен аллине çакланĕç. Телейне кура усал амакран хăтăлса юлсан юрĕ-ха тата...
Суррогатлă эрех _ ахах, хаклă йышши чул мар: йăлтăртатмасть, куçа та шартармасть. Пĕрре пăхсан ăна ыттисенчен уйăрса та илеймĕн. Эрех кĕленчи те йĕркеллĕ, этикетки те вырăнта, суту-илỹ енĕпе ыйтакан ытти паллисем те пур... Çавăнпа та пĕли-пĕлми эрехе çăвара илменни _ чи шанчăкли.
Источник: "Авангард" (газета Батыревского района)