25 марта 2016 г.
Чылай чухне сывă çынсен те, сусăррисен те хăйсене паракан çăмăллăхсем, реабилитацилемелли техника хатĕрĕсем, илтмелли аппаратсем тата ытти пирки те ыйту çине ыйту пуçтарăнса каять. Мартăн 31-мĕшĕнче шăпах çакнашкал пăшăрханусене, иккĕленỹсене куçа-куçăн, уççăн татса пама май пулать. Çак кунхине 14 сехетре пирĕн районти граждансене Раççей Федерацийĕн социаллă страховани Фончĕн Чăваш Республикинчи регионти уйрăмĕн Патшалăх учрежденийĕн управляющийĕ Галина Григорьевна Николаева хăйсен ыйтăвĕпе йышăнать. Тĕл пулăва çакланас тесен маларах 6-15-92 телефонпа çырăнмалла.
Йышăну Патăрьелĕнчи Ленин проспектĕнчи 29 çуртăн 111-мĕш пỹлĕмĕнче иртет. Юлашки çулсенче районта граждансен социаллă тивĕçтерĕвĕ пирки çакнашкал тĕл пулу пулман. Çавăнпа та май пур чухне Патшалăх урежденийĕн управляющийĕпе кирек мĕнле ыйтăва та уçăмлатса юлма пултаратăр.
Источник: "Авангард" (газета Батыревского района)