29 апреля 2016 г.
Патăрьел каччисемпе матур арĕсем помост çине тухсан чăнах та чун савăнать темелле. Вĕсем тĕреклĕ хул-çурăмлă çеç мар, кĕрешỹ техникине ăста пĕлнипе те палăрса тăраççĕ. Юлашки çулсенче спортăн çак тĕсĕ анлăран та анлă сарăлса, вăй илсе пырать. Çамрăк спортсменсем пĕрин хыççăн тепри çитĕнỹ тунишĕн савăнмалăх пур.
Акă, çак кунсенче Чĕмпĕр облаçĕнчи Димитровград хулинче Атăл тăрăхĕнче пурăнакансем хушшинче корэш енĕпе иртнĕ Пĕтĕм Раççейри турниртан каччăсем пушă алăпа килмен. "Паттăр" ДЮСШ тренер-преподавателĕ Эльфис Мтеев ертсе пынипе Шăнкăртамри Феизов ячĕллĕ вăтам шкулти Р. Кардонов хăйĕн виçе ушкăнĕпе пĕрремĕш вырăн çĕнсе илнĕ. Тутар Сăкăтĕнчи шкулта вĕренекен А. Махмутовпа Н. Хасянов иккĕмĕшпе виççĕмĕш вырăнсене йышăннă.
Источник: "Авангард" (газета Батыревского района)