17 мая 2016 г.
РЕСПУБЛИКĂРИ следстви управленийĕн аслă пулăшуçи О. Дмитриев хаçат редакцине çитернĕ хыпар тăрăх çак усал ĕç пирĕн районта та пулман, Канаш тăрăхĕнче сиксе тухнă. Преступлени çулĕ çине тăнă арçын вара Тутар Сăкăтĕнчен. Çакскер пĕррехинче хăйне водитель правинчен хăтарнине пăхмасăрах руль умне кĕрсе ларнă. Вăл çеç те мар-ха тата... Самаях хĕрĕнкĕ пулнă.
Ун пек чухне çул-йĕр инспекторĕсем ун ячĕпе протокол çырасси, ăна саккунлă майпа айăпласси паллă ĕнтĕ. РФ КоАПăн 12.7 статйин 2 пайĕпе килĕ- шỹллĕн ăна 30 пин штраф, 15 суткана административлă арест е тата 200 сехет таран ĕçлесе татмалли услови кĕтнине пĕлсен, водитель аптăраса тăман, йывăрлăхран хăтăлас тĕллевпе пакунлине 500 тенкĕ взятка сĕннĕ. Çакăнпа ĕç-пуç пĕтет тенĕ-ши? Лешĕ, паллах, унпа чысне вараламан.
Суд приговорĕпе килĕшỹллĕн саккуна пăсакана 25 пин штраф панă тата... Унсăр пуçне миравай судьян постановленийĕпе ун ĕнси çинчех 200 сехет ĕçлесе татмалли административлă яваплăх та.
Источник: "Авангард" (газета Батыревского района)