16 августа 2016 г.
Ĕнер, августăн 15-мĕшĕнче, Пĕтĕм Раççейри ял хуçалăх çыравĕ вĕçленчĕ "Ялта çителĕклĕ _ çĕршыв тĕреклĕ" ятпа йĕркеленĕ Пĕтĕм Раççейри ял хуçалăх çыравĕ районта ăнăçлă иртрĕ. Районти пилĕк участокра 32 çыравçă тата пилĕк инструктор ĕçе кал-кал та тухăçлă йĕркелесе пычĕç, кашни çемьене çитсе хуçалăхпа çыхăннă кирлĕ хуравсене çырса илчĕç. Çыравçăсен ĕç объекчĕ сахалах пулмарĕ. Июлĕн 1-мĕшĕнчен пуçласа августăн 15-мĕшĕччен вĕсенчен кашнийĕшĕн 460-тан кая мар çемьери хуçалăха тишкерме тиврĕ. Çавăнпа та пĕрремĕш участокри И. Карсакован та тăван Алманчă ялĕнче пурăнакансемпе çеç мар, Сăкăтри хăш-пĕр çемьесемпе те çырав анкетинчи ыйтусемпе чуна уçса калаçма тивнĕ.
_ Пĕтĕмĕшле илсен ял çыннисем ял хуçалăх çыравĕ пирки тулли информаци илни сисĕнчĕ. Кирек хăш вăхăтра вĕсем патне пырсан та хуравсене кăмăлтан пачĕç, турткаланса, хирĕçлесе тăмарĕç. Çулĕпе аслăрах хăш-пĕр çынсем çеç "Ку сире мĕн тума кирлĕ, кăтартусене налук службине памаççĕ-и?" _ текен ыйтусемпе кăсăкланкаларĕç",_ кăмăлтан пĕтĕмлетрĕ хăйсен ĕçне Ираида Алексеевна Карсакова çыравçă.
А. Егорова.
Автор сăн ỹкерчĕкĕнче: пĕрремĕш участокри И. Чиркина инструкторпа И. Карсакова çыравçă хут ĕçĕнчи кăтартусене тĕрĕслеççĕ
Источник: "Авангард" (газета Батыревского района)