20 сентября 2016 г.
ÇĔНĔ вĕренỹ çулĕ пуçланнă хыççăн районти пушар надзорĕн сотрудникĕсем кашнийĕнчех вĕренỹ учрежденийĕсенче "Шкул" ятпа профилактика уйăхлăхне йĕркелеççĕ. Районти "01" службăн аслă инспекторĕ А. Симуков хаçат редакцине пĕлтернĕ тăрăх, кăçал çакнашкал мероприяти августăн 15-мĕшĕнчен пуçласа сентябрĕн 15-мĕшĕччен пынă. Çак тапхăрта инспекторсем шкулсенче "пушар" е ытти "инкек" сиксе тухнă вăхăтра хăвăрт тата йĕркене пăхăнса ачасене эвакуацилессине, вĕсене хăрушлăхран хăтарассине, вут-çулăма парăнтармалли хатĕрсемпе усă курассине каласа ăнлантарнă тата тренировка туса хăнăхтарнă. Андрей Анатольевич çирĕплетнĕ тăрăх, вĕренекенсен ку тĕлĕшпе теори шайĕ те çителĕклĕ, практика тĕлĕшпе те аван. Чăн пурнăçра çеç инкекпе куçа-куçăн пуласран аслă Пỹлĕхĕмĕр сыхлатăр.
Источник: "Авангард" (газета Батыревского района)