02 декабря 2016 г.
Тăрăнтан Кĕçĕн Арапуçне каякан çулпа унталла та кунталла техника вăшлатса çеç çỹрет. Тин çеç туса пĕтернĕ çатма пек тип-тикĕс асфальтпа ярăнма та кăмăллă çав. Нумай пулмасть кăна кунта кĕрлĕ-çурлă пылчăк çăрăлнине, çавна май Хирти Пикшикре, Еншикре, Кĕçĕн Арапуçĕнче пурăнакансен тавра çулпа çỹреме тивнине халь ĕненес те килмест. Çак ялсенчи çынсемшĕн ку чăн-чăн парне пулчĕ. Ахальтен мар ĕнтĕ "Тăрăн _ Кĕçĕн Арапуç" çула ĕнер, декабрĕн 1-мĕшĕнче, чыслă лару-тăрура уçма хутшăннă районти депутатсен Пухăвĕн депутачĕ П. Козлов: "Ку çула тума тытăннă чухне эпĕ 6ра пулнă, халь 60 çулта. Тинех ĕмĕт тулчĕ, çакăншăн ял, республика, район ертуçисене, депутатсене пысăк тав тăвать", _ терĕ хĕпĕртесе. Халăх савăнăçне питĕ лайăх ăнланма пулать. Çавра çỹрен пыл хыпнă, теççĕ пулсан та кĕске çул пурри аванрах: вăхăт та, çунтармалли-сĕрмелли материал та самаях перекетленет, палăртнă вырăна та часрах çитетĕн.
Çула кăçалхи август уйăхĕнче "РЭМИСС" пĕрлешỹ тума пуçланă. Кĕске вăхăтрах вĕсем тăп- рана хăпартрĕç, пĕрлех дренаж ĕçĕсене пурнăçларĕç, кирлĕ паллăсене вырнаçтарчĕç. Хĕл сиввисем çитиччен асфальт сарса техникăна çỹреме юрăхлă турĕç.
"Тăрăн _ Кĕçĕн Арапуç" çула уçнă çĕре ЧР Министрсен Кабинечĕн Председателĕ И. Моторин, Чăваш Патшалăх Канашĕн депутачĕсем О. Мешковпа К. Ер- молаев, район пуçлăхĕ М. Петров, район администраци пуçлăхĕ Р. Селиванов тата ытти сумлă хăнасем хутшăнчĕç. Вĕсем çак çулпа çỹреме пурне те сывлăх тата малашне те килĕштерсе ĕçлеме суннă хыççăн хĕрлĕ хă-йăва çамрăк ăрупа пĕрле касрĕç.
Çĕнĕ çул хута кайрĕ, халăх кăмăлĕ те тулчĕ.
Н. МАЗЯКОВА
Кĕскен: "Тăрăн _ Кĕçĕн Арапуç" çул тăршшĕ 3,25 çухрăм, унăн сарлакăшĕ 6 метр.
Объекта "2014-2017 çулсенчи тата 2020 çулчченхи планлă тапхăрти ялсен çирĕп аталанăвĕ" федерацин тĕллевлĕ программипе килĕшỹллĕн тунă. Çулăн смета хакĕ _ 44223,220 пин тенкĕ
Источник: "Авангард" (газета Батыревского района)