14 апреля 2017 г.
Апрелĕн 1-мĕшĕнчен 18 çул тултарнă яш-кĕрĕмшĕн çурхи призыв кампанийĕ пуçланчĕ. Районти çар комиссариачĕ умĕнчен çĕмĕрт шап-шурă çеçке çуричченех юлташ-пĕлĕшĕпе тăван-пĕтенĕ пулас салтака сĕт çулĕпе кайса çу çулĕпе килме пил парĕ. Хальхи вăхăтра çар тумне тăхăнма хатĕрленекен яш-кĕрĕм медицина, призыв комиссийĕсен "али" витĕр тухать. Сăмах май каласан, хальхи призывра Патăрьел тата Шăмăршă районĕсенчен 80 каччă çар йĕркине йышăнса хура сăран атă тăхăнĕ. Вăл шутра 60-шĕ Юхмапа Пăла тăрăхĕнчен. Çакна та палăртма кăмăллă: салтака кайма повестка илекенсенчен чылайăшĕ аслă шкултан вĕренсе тухнăскерсем. Урăхла каласан, ăс-тăнпа çирĕпленсе çитнĕ темелле, ỹт-пĕве пиçĕхтересси çеç юлать. Ят тухнисем хушшинчех контрактпа çар пурнăçне тăсас тĕллевлисем пулни те кăмăллă.
Источник: "Авангард" (газета Батыревского района)