19 апреля 2008 г.
Астрахань хулинче пилĕкрен алшăллипе тытса кĕрешес енĕпе Раççей чемпионачĕ иртрĕ. Чăваш Республикин чысне унта Патăрьелĕнчи 7-мĕш профучилищĕре вĕренекен Елчĕк каччи Андрей Адюков та хÿтĕлерĕ.
А.Адюков малтанхи тупăшусенче Саратов, Карачай-Черкесс, Самара, Мускав, Санкт-Петербург, Пушкăртстан спортсменĕсенчен выляса илнĕ. Анчах 7-мĕш тупăшура Карачай-Черкессин тепĕр спортсменне Артур Гоголя парăнтарайман. Çапла вара Андрейĕн 5-мĕш вырăнпа çырлахма тиврĕ.
А.Адюков спорт мастерĕн нормине 2003 çултах тултарнă. Республикăри профучилищĕсенче вĕренекенсем хушшинче икĕ хут чемпион пулнă. Унăн тренерĕ – Çĕнĕ Шупашкарти спортшкул преподавателĕ В.Васильев. Хальхи вăхăтра ăна РФ професси вĕрентĕвĕн отличникĕ, аслă категориллĕ преподаватель Н.Чинкин пулăшса пырать.