17 мая 2008 г.
Майăн 11-мĕшĕ
Çак кун арçынсем 50 километра утнипе пуçланнă. Ку дистанци пирĕн çĕр-шыва тата икĕ медальпе тĕнче рекордне парнеленĕ. Марафон дистанцийĕнче Тĕнче кубокĕн çĕнтерÿçи Саранскри хăвăрт утакансен шкулĕн воспитанникĕ Денис Нижегородов пулса тăнă. Унăн вăхăчĕ – 3 сехет те 34 минут та 14 секунд. Ку вăл çĕнĕ тĕнче рекорчĕ! Унăн юлташĕ Владимир Канайкин финиша 2 минут та 41 секунд каярах çитнĕ, иккĕмĕш вырăн йышăннă. Виççĕмĕш вырăнта – Итали спортсменĕ.
Тĕнчен çĕнĕ чемпионĕ журналистсемпе тĕл пулнă чухне ăмăртăва питĕ лайăх йĕркеленине палăртнă, тав тунă. В.Канайкин та хутшăннă Д.Нижегородов сăмахĕсем çумне.
Малалла 20 километра утмашкăн хĕрарăмсем старта тăнă. Кунта та Раççей спортсменкисем хăйсене лайăх енчен кăтартнă. Ылтăн медале Ольга Канискина çĕнсе илнĕ. Вăл пирĕн Олимпиада Ивановăн 2002 çулхи тĕнче рекордне пĕр секунд çеç çитеймен.
Призерсен шутне Чăваш Ен спортсменки Татьяна Сибилева та кĕнĕ, иккĕмĕш вырăн йышăннă. Тепĕр чăваш спортсменки Людмила Архипова тăваттăмĕш вырăнта.
Ольга Канискина ăмăрту çÿллĕ шайра иртнине палăртнă.
Шупашкарта иртнĕ XXIII Тĕнче кубокĕнче Раççей атлечĕсем 15 медаль çĕнсе илнĕ, кубока тивĕçнĕ.
Дистанцисенче 55 çĕр-шыври 480-а яхăн хăвăрт утакан тупăшнă.
Сывă пул, ăмăрту!
Каç кÿлĕм Шупашкарта XXIII Тĕнче кубокне вĕçленĕ ятпа савăнăçлă церемони иртнĕ. Унта Чăваш Республикин Президенчĕ Николай Федоров, Çăмăл атлетика федерацийĕсен Тĕнчери ассоциацийĕн (ИААФ) Президенчĕ Ламин Диак, Раççейри çăмăл атлетика федерацийĕн президенчĕ Валентин Балахничев, ытти официаллă çынсем хутшăннă.
Раççейĕн пĕрлештернĕ команди ăмăртăвăн абсолютлă çĕнтерÿçи пулса тăнă, командăпа шутласан кашни программăра мала тухнă. Пĕрлехи çĕнтерĕве Чăваш Ен спортсменкисем Ирина Юманова, Татьяна Сибилева, Людмила Архипова пысăк тÿпе хывнă.
Н.Федоровпа В.Балахничев 20 километра утнă хĕрарăмсене медальсем, Раççей командине Тĕнче кубокне панă. Н.Федоров Т.Сибилевăна Шупашкарта хваттер илме сертификат парнеленĕ.
Ламин Диак ăмăртăва йĕркелекенсене тав тунă, Шупашкарти кунсем ĕмĕр асра юласса шантарнă. Çавăн пекех вăл Раççей командине пысăк çĕнтерÿпе саламланă. Чăваш Республикин Президентне Н.Федорова ăмăртăва йĕркелесе ирттерме тÿрремĕнех хутшăннăшăн ылтăн медальпе наградăланă.
Шупашкар хула пуçлăхĕ Николай Емельянов ИААФ ялавне Мексикăри Чиуауа хулине панă. Хăвăрт утас енĕпе XXIV Тĕнче кубокĕ 2010 çулта унта иртет.
“Сывлăх уявĕ, спорт уявĕ, пуласлăха ĕненни пирĕн пурнăçăн аталанăвĕн хăвăртлăхне палăртаççĕ. Иртсе кайнă Тĕнче кубокĕ – Чăваш Ен çĕнĕ тÿпеме çĕнсе илмелли черетлĕ утăм. Эпир тата та анлăрах ăмăртусем, сăмахран, çăмăл атлетика енĕсемпе тĕнче чемпионатне те ирттерме пултарăпăр. Пухнă опыт çакна тума май парать. Чарăнса тăма юрамасть!”, – палăртнă Николай Федоров журналистсен умĕнче.
Ламин Диак та Чăваш Енре кирек мĕнле ăмăрту ирттерес пулсан та пулăшма шантарнă.
А.АЛЕКСЕЕВ.