17 мая 2008 г.
Районта тĕпрен илсен çурхи тĕш-тырă культурисене акса пĕтернĕ. Вĕсем 11336 гектар йышăнаççĕ. Акăнмасăр юлни тĕллĕн-тĕллĕн тăпра нÿрĕрех вырăнсенче çеç. Хальхи вăхăтра хуçалăхсенче пикенсех çĕр улми лартаççĕ. Паянхи кун тĕлне 1262 гектар лартма ĕлкĕрнĕ. Ку ĕç малалла пырать.
Планпа 248 гектар сахăр чĕкĕнтĕрĕ акма палăртнă пулсан, 234-шне акнă. Ку ĕç “Колос” хуçалăхра вĕçленеймен-ха.
Кăçал пахча çимĕç лаптăкне 2 хут ÿстернĕ, 79 гектара çитернĕ. “Чернушка” сухан та 60 гектар йышăнать.
Тăватă хуçалăхра 232 гектар рапс, “Малалла”, “Хастар” хуçалăхсенче 85 гектар кукуруза акнă.
Манăçа туха пуçланă культурăсене те хисепе хунă, “Труд” хуçалăхра 15 гектар соя, “Мир”, “Хастар” хуçалăхсенче 33 гектар хуратул акнă.
Хальхи вăхăтра тата тепĕр хĕрÿ тапхăр пуçланчĕ: калчасене лайăх пăхса ÿстермелле. Çум курăксене пĕтерме 3500 гектар çинче гербицидсем сапнă.
Паянхи кун тĕлне уй-хирти хурт-кăпшанка пĕтерме хими им-çамĕ сапма тытăннă. Çак ĕçе 3400 гектар çинче пурнăçланă.
Кăçал ял хуçалăх предприятийĕсенче 7000 гектар ытла кĕрхи культурăсем акмалла. Ун валли çĕр хатĕрлеме пуçланă ĕнтĕ.
В.АЛЕКСЕЕВ, АПК предприятийĕсемпе хутшăнусем йĕркелекен пайăн тĕп специалист-эксперчĕ.
Паллашăр: Президент стипендиачĕ
Анна Шашкова вун тăватă çул тултарсан чунĕ ыйтнипе тата хушнипе велосипед спорчĕпе хăйĕн тĕп тĕллевне çыхăнтарнă. 1995 çулта Патăрьелĕнчи ачасемпе çамрăксен спорт шкулне çÿресе хăйĕн пултарулăхне туптанă. Çамрăклах район, республика шайĕнче иртекен ăмăртусене хастар хутшăннă, çитĕнÿсем тунă. Çакăншăнах çамрăк спортсменкăна 1996 çулта Шупашкарти Олимп резервĕсем хатĕрлекен училищĕне йышăннă. Вĕреннĕ тапхăрта Анна Раççейре маунтинбайк енĕпе иртекен ăмăртусенчен пĕрре мар çĕнтерÿпе таврăннă, Германире, Австрире, Швейцарире иртнĕ спорт тупăшăвĕсене хутшăннă, Раççей спорт мастерĕн нормативне пурнăçланă.
Анна Александровна пиллĕкмĕш çул ĕнтĕ алла диплом илнĕ хыççăн ачасемпе çамрăксен спорт шкулĕнче велоспорт енĕпе тренер-преподавательте тăрăшать. Хăйĕн ĕçне чунтан парăнса пурнăçлать вăл. Çавăнпа та вĕренекенсене те хăйсен тĕллевне пурнăçа кĕртме хăнăхтарать. Унăн вĕренекенĕсем Максимпа Надя Емельяновсем маунтинбайк енĕпе республика тата Раççей Кубокĕн призерĕсем.
Вăл маунтинбайк енĕпе Тĕнче чемпионачĕн участници, Раççей чемпионатĕнче темиçе хутчен пулнă призер, Чăваш Республикин чемпионки, Раççей спорт мастерĕ. Çакнашкал çитĕнÿсене вырăна хунăран, хакланăран унăн кандидатурине Чăваш Республикин Президенчĕн стипендине илме сĕннĕ те ĕнтĕ. 27 çулхи спортсменка çакна тивĕçлех.
А.НИКОЛАЕВА.