Публикации » Чăваш Енре спорт – пурнăçăн пĕр пайĕ

21 мая 2008 г.

Чăваш Ен Президенчĕ Николай Федоров Раççейĕн хăвăрт утакансен ХХIII Тĕнче кубокне хутшăннă командин йышĕнче тупăшнă чăваш спортсменĕсемпе тата вĕсен тренерĕсемпе тĕл пулнă. Тĕл пулăва уçнă май республика пуçлăхĕ пуçтарăннисене спортри паттăрлăхшăн тав тунă. Çавăн пекех чаплă спорт уявне йĕркелесе ирттерме хутшăннисем те унăн тав сăмахне тивĕçнĕ. Н.Федоров юниоркăсен хушшинче 10 километрлă дистанцире кĕмĕл медале тивĕçнĕ Ирина Юмановăна, ăна вĕрентекен Альбина Семеновăна тата Татьяна Сибилева тренерне Николай Родионова çăмăл автомобиль уççисене панă. Çĕнтерме ăнтăлнăшăн çамрăк спортсмена Эдикт Хайбуллина çĕнĕ йышши ноутбук парнеленĕ. Тĕнче кубокне хупнă чухнехи церемонире Н.Федоров 20 километра утса “кĕмĕл” çĕнсе илнĕ Татьяна Сибилевăна Шупашкарта хваттер илмелли сертификат панă пулнă. Калаçу вăхăтĕнче Чăваш Енри спорт аталанăвĕн малашлăхне сÿтсе явнă. Спортсменсемпе тренерсене çавăн пекех республика Президенчĕн Администрацийĕн ертÿçи Анатолий Шарапов саламланă.