21 мая 2008 г.
Шкулта 822 ача вĕренет. 34 класс-комплект туса хунă. Кашнийĕшĕнче 25-шер вĕренекене яхăн. Пĕлÿ илме 12 ялтан çÿреççĕ. 180-шне шкулăн икĕ автобусĕ турттарать. Вĕренекенсене пĕлÿ парассишĕн 69 педагог ĕçлет. Вĕсенчен вун виççĕшĕ аслă, 40-шĕ пĕрремĕш, 11-шĕ иккĕмĕш категориллĕ.
Аслă классенче вĕренекенсем профильлĕ пĕлÿ илме пултараççĕ. Пĕр-лĕхлĕ патшалăх экзаменĕсене хатĕрлессине тĕллевлĕ илсе пыратпăр. Информаци стендне тунă. Вунпĕрмĕшсем шкулта вĕрентÿ технологийĕсен центрĕ хатĕрленĕ тест ыйтăвĕсене хуравлассипе экзаменсене кĕме хăнăхаççĕ. Сăнавлă тĕрĕслев ĕçĕсем те ППЭпех çыхăннă. Ахальтен мар математикăпа, вырăс чĕлхипе пĕрлĕхлĕ патшалăх экзаменне тытакансен пысăк балĕ пирĕн шкулта пĕлÿ пухакансен пулать. Иртнĕ çул 117 выпускник алла аттестат илчĕ. Çиччĕшĕ ылтăн, иккĕшĕ кĕмĕл медальсене тивĕçрĕç.
Вĕрентÿ пахалăхне лайăхлатассинче учительсем хăйсен ĕçĕпе интересленни пысăк пĕлтерĕшлĕ. Унчченхи кивĕ мелсенчен хăтăлса пырса çĕннисене шыратпăр. Хăйсене валли методика литературине пуянлатсах пыраççĕ. Шкул базинчи методика центрĕнче 30 учитель компьютера вĕренчĕç.
Иртнĕ çул 49 вĕренекен, кăçал 53-шĕ районти предмет олимпиадисемпе наукăпа практика конференцийĕсенче малти вырăнсене йышăнчĕç. Спартакиадăра шкул пĕрремĕш вырăна тухрĕ. Вĕренекенсем Пĕтĕм Раççейри “Портфолио” тĕпчевпе ăсталăх конкурсне хутшăнаççĕ. Унта А.Тукмаковпа А.Логунова ĕçĕсене ырларĕç.
15 ача Çĕнĕ Шупашкарти “Наука, творчество, аталану” регионаллă фестиваль-конференцие хутшăнчĕ.
Хальхи вăхăтра шкулта информаципе коммуникациллĕ технологине çул парасси анлăн сарăлса пырать. Вырăс чĕлхипе литературине вĕрентекен А.Майрина, Е.Краснова биологăн, Н.Карягина химикăн, историпе пĕлÿ паракан Н.Андреева, В.Гранатскийпе Т.Журавлева информатиксен, пуçламăш классенчи Л.Максимова педагогсен ĕçĕ-хĕлĕ курăмлă пулнине уйрăммăн палăртса хăварас килет. Учительсен ĕç ăсталăхне шкул сайтне те кĕрсе пăхма пулать. Уроксенче электронлă изданисемпе усă курни вĕрентÿ процесне çĕнĕлĕхсем кĕртме май паратех. Вĕсем класс тулашĕнчи ĕçсенче те вырăнлă. Ку енĕпе А. Гранатская, В.Федорова, Э.Карягина, Е.Маркиданова, Н.Емелина, Н.Кошкина, ытти педагогсен тăрăшулăхне палăртмалла.
“Вĕрентÿ” наци проектне пурнăçа кĕртнĕ май биологи, хими, географи кабинечĕсене çĕршер пин тенкĕ ытларах пуянлатнă. Иртнĕ çул 80 пин тенкĕлĕх спорт оборудованине, пĕрремĕш классен сĕтел-пуканне çĕнетнĕ. Проекта пурнăçа кĕртсе пынă май 400 пин ытла тенкĕлĕх кухня оборудованийĕсене улăштарнă.
Шкул условийĕпе килĕшÿллĕн попечительсен канашне йĕркелерĕмĕр. Вĕрентÿ пахалăхне лайăхлатма классенчи ашшĕ-амăш комитечĕсем те пулăшаççĕ. Вĕсен тăрăшулăхĕпе 5 вĕренÿ кабинетне, 3 класа тирпейлесе уйрăм шкафсемпе тивĕçтернĕ.
Маттур вĕренекенсене, олимпиада, конкурс çĕнтерÿçисене хакласси вырăнта. Д.Федоськин, А.Алеева, А.Тукмаков район пуçлăхĕн стипендине илсе курнăскерсем. Г.Тямина, В.Лекарев республика Президенчĕн стипендине илеççĕ.
Шкулта ачасене апатлантарасси тивĕçлĕ шайра. Обществăлла апатлану предприятийĕпе килĕшÿ тунăран блюдăсен ассортименчĕ пуянланчĕ. Менюна пысăк калориллĕ аш-какай, пулăран хатĕрленисене кĕртеççĕ. Апат кулленхи 16-20 тенке ларать.
Çулленех шкул администрацийĕ ашшĕ-амăшне тĕрлĕ ыйту çине хуравласа анкета çыртарать. Ун тăрăх педагогсен ĕçне, ачасен вĕренĕвне хаклама, лайăх енсене, начаррисене палăртма пулать. Ырă сĕнÿсене малашнехи ĕçре усă куратпăр, çитменлĕхсене пĕтерсе пыратпăр. Çакнашкал ĕçлени ÿсĕм кÿретех.
В.СОЛДАТОВ,
Патăрьелĕнчи пĕрремĕш вăтам шкул
директорĕ.
Редакцирен: Патăрьелĕнчи 1-мĕш номерлĕ вăтам шкул Раççей Президенчĕн грантне çĕнсе илнĕ, 1 миллион тенке тивĕçнĕ. Учительсемпе вĕренекенсене çак ятпа саламлатпăр, малашне те ăнăçусем сунатпăр.