24 мая 2008 г.
Пикшик ял тăрăхне кĕрекен кашни Культура çурчĕпе вулавăшрах Çемье çулталăкне халалласа тĕрлĕрен мероприяти ирттернĕ. Сăмахран, Еншикпе Тикешре спорт тупăшăвĕнче чи-чи вăйлă спорт çемйисене суйласа илнĕ. Хирти Пикшикри тĕслĕх вулавăшĕнче ялти нумай ачаллă çемьесене çавра сĕтел тавра пуçтарнă. Тĕл пулура вĕсен кăтартуллă, ырă ĕçĕ пирки калаçнă, çемье концертне пăхса савăннă. Э.Камалетдинова библиотекарь Калмыковсен çемье презентацийĕ пирки кăтартнă.
Кĕçĕн Арапуçĕнче вара призывниксен çемйисене тĕл пулăва чĕннĕ. Çывăх кунсенчех пилĕк каччă çĕр-шыв хуралĕнче вырăн тупĕ. Ял-йыш, тăван-пĕтенĕ вĕсене çапла чыслани çар хĕсметне пысăк хавхаланупа кайса килме çеç пулăшĕ.