24 мая 2008 г.
Çар хĕсметĕнче тăнă çын яланах хисеплĕ пулнă. Вăл паян та çаплах. Хальхи вăхăтра çул çитнĕ çамрăксене çара илмелли çуркуннехи тапхăр пырать. Пирĕн хаçат сотрудникĕ Патăрьел тата Шăмăршă районĕсен çар комиссарĕпе Валерий Николаевич Яковлевпа тĕл пулса хăш-пĕр ыйтусене хускатнă.
– Хальхи вăхăтра çар çыннин чысĕ, ят-сумĕ еплерех;
– Саманан кирек хăш тапхăрĕнче те çар тумне тăхăннă çын чыслă, хисеплĕ шутланать. Паян унăн пĕлтерĕшĕ, витĕмĕ ÿснине туятпăр. Çар çыннисене юлашки вăхăтра патшалăх енчен те тимлĕх уйăраççĕ. Çакă чăн малтан салтака кăмăлтан кайма май туса парать. Хальхи призывра утмăла яхăн каччă тĕрлĕрен çарта тăван çĕр-шыва хÿтĕлĕ.
– Армие модернизациленĕ тапхăрта мĕнле позитивлă улшăнусене калама пултаратăр;
– “Салтак тивĕçĕ тата çар служби çинчен” федераллă саккуна улшăнусемпе хушăмсем кĕртнĕ май, халĕ граждансен действительнăй службăра пĕр çул çеç пулмалла. Çак кĕске сроклă службăран Патăрьел каччисем пур енĕпе те пиçĕхнĕ чăн-чăн арçынсем пулса таврăнасса шанатăп.
– Валерий Николаевич, çамрăксене çар ретне тăма çирĕп хатĕрлесси вырăнти ял тăрăхĕнчен те килет. Паха опыт вырăнне камсене тĕслĕх илсе кăтартма пултаратăр;
– Тĕпрен илсен кашни ял тăрăхĕнчех çамрăксене патриотла воспитани парас енĕпе ĕçлеççĕ, пĕлтерĕшлĕ мероприятисем йĕркелеççĕ. Ку енĕпе уйрăмах Çĕнĕ Ахпÿрт, Тутар Сăкăт, Шăнкăртам ял тăрăхĕсене ырăпа асăнмалла.
А.ЕГОРОВА калаçнă.