28 мая 2008 г.
Патăрьелĕнчи 1-мĕш вăтам шкул территорийĕнче çамрăк çул-йĕр инспекторĕсен “Хăрушлăхсăр кустăрма” конкурсĕ иртрĕ. Вăл икĕ тапхăрпа пулмалла: районта тата республикăра. Шкул ачисен çак мероприятийĕ “Çул-йĕр хăрушсăрлăхне 2006-2012 çулсенче ÿстересси” тĕллевлĕ программăпа пырать.
Конкурсăн тĕллевĕ: ачасем çапкаланса çÿресрен асăрхаттарасси, çул-йĕр çинче çÿрекенсене саккунлăха пăхăнма хăнăхтарасси, сывă пурнăç йĕркине сарасси, çул çитмен çамрăксене правăна пăсасран асăрхаттарасси, ачасем çул çинче инкек курнине чакарасси, ачасене Çул-йĕр правилисене çирĕп алла илме пулăшасси, çамрăк инспекторсен отрячĕсен йышне ÿстересси, физкультурăпа спорта çамрăксене анлăн явăçтарасси.
Конкурса 10-12 çулхи ачасем хутшăнчĕç. Командăра 4 çын (2 арçын ача, 2 хĕрача).
Конкурсра çакăн пек енсемпе тупăшрĕç: Çул-йĕр правилисене пĕлессипе теориллĕ экзамен, “автохулара” велосипедпа ярăнасси, велосипедпа фигурăсем туса çÿресси, страховани никĕсне пĕлесси, пĕрремĕш медпулăшу парасси.
Çул-йĕр правилисене пĕлессипе 1-мĕш вырăна А.Петрова (Алманчă), 2-мĕшне Е.Токмакова (Патăрьелĕнчи 1-мĕш шкул), 3-мĕшне Л.Сафиуллова (Тутар Сăкăт) йышăнчĕç.
Конкурсра Патăрьелĕнчи 1-мĕш вăтам шкул команди çĕнтерчĕ. Ун хыççăнхи вырăнсенче – Алманчăри тата Кивĕ Ахпÿртри шкулсем.
Патăрьелĕнчи 1-мĕш вăтам шкул чысне А.Елкин, Н.Терентьев, О.Сорокина, Е.Токмакова хÿтĕлерĕç.
Т.БОРИСОВА,