27 июня 2008 г.
Халăх пултарулăхĕн Пĕтĕм Раççейри фестивалĕ – Республика кунне уявлакан тĕп самантсенчен пĕри. Вун улттăмĕш хут иртет вăл Чăваш Енре.
Тĕрлĕ çулта фестивале Америка, Турци, Египет, Германи, Итали юрăçисемпе ташă ăстисем хутшăннă. Кăçалхине 30 ытла регионтан – Владимир, Волгоград, Иваново, Киров, Мускав, Чулхула, Оренбург, Рязань, Саратов, Тверь, Свердловск, Ульяновск, Ярославль, Тюмень, Самар облаçĕсенчен, Краснодар, Красноярск, Пермь крайĕсенчен, Ненец автономи округĕнчен, Пушкăртстан, Тутарстан, Коми, Мордва, Удмурт, Калмăк, Мари Эл республикисенчен – фольклор ансамблĕсем килсе çитрĕç. Чикĕ леш енчен те пур хăнасем – Бельгирен “Динамо” коллектив хутшăнать. Маларах пĕр çĕр-шыврах пурăннă, халĕ çывăхри ют çĕр-шыв пулса тăнă Эрмен Республикинчи “Мика” этнографи ташă ансамблĕ те фестивале пуянлатать. Раççей халăх артистки Надежда Бабкина ертсе пыракан “Русская песня” ансамбль тата çак кунсенче асăннă коллективпа республика тăрăх çÿрекен ушкăнсем “Раççей çăл куçĕсен” хăватне, мухтавне, вăйне çĕклеççĕ. Фестивале çавăн пекех хамăр республикăри, тĕрлĕ тарăхри йăхташсен коллективĕсем те илем кÿреççĕ.
Фестивале хутшăнакан коллективсем юрласа, ташласа утса Хĕрлĕ лапама çитрĕç. Ятарласа хатĕрленĕ сцена çине тухса пуçтарăннă халăха пуç тайрĕç, хăйсемпе паллаштарчĕç.
18 сехет тĕлне уяв картине ЧР Президенчĕ Н.Федоров, сумлă хăнасем, Раççей Геройĕсем – РФ Хăрушсăрлăх службин авиаци управленийĕн пуçлăхĕ, пирĕн ентеш Н.Гаврилов, РФ Патшалăх Думин депутачĕ Н.Бударин космонавт, Раççей халăх артисчĕ, паллă шоумен, телеертÿçĕ Л.Якубович тата ыттисем килсе çитрĕç.
Николай Федоров тĕп хула çыннисене, хăнасене, “Раççей çăл куçĕсем” фестивале хутшăнакансене пысăк уявпа саламларĕ:
– Çĕртме уйăхĕн 18-мĕшĕнчен пуçласа тĕп хулара Раççейри 58 субъект, чикĕ леш енчи 24 çĕр-шыв представителĕсем пулса курчĕç. Хам çеç 12 çĕр-шывăн посолĕсене йышăнма ĕлкĕртĕм. Çакă эпир маттуррине, ĕçлеме, хăнасене тивĕçлĕ кĕтсе илме пултарнине çирĕплетет. Пирĕн вĕсене кăтартмалли, мĕнпе паллаштармалли пур. Çакăн пек халăхпа, республикăпа тивĕçлипе мухтанатăп. Паян сире – “Раççей çăл куçĕсем” фестивале хутшăнакансене – Чăваш çĕрĕ çинче курма питĕ хавас. Эсир пуррипе Раççей пуян, – терĕ Николай Васильевич.
Леонид Якубович та саламларĕ. Чăвашсен ячĕпе ырă сăмах каларĕ. “Пĕр вырăнта харăсах сакăр объекта ĕçе янине (сăмах Йĕпреç районĕ пирки. – Н.С.) 15 çул хушшинче тĕл пулманччĕ-ха”, – терĕ халăх артисчĕ.
Унтан кĕвĕ-çемĕ хуçаланма пуçларĕ. Унăн ахрăмĕ Атăл тăрăх инçе-инçе кайса пĕтĕм Раççейĕпех саланчĕ-тĕр...
Надежда СМИРНОВА.