27 июня 2008 г.
Пирĕн шкул выпускникĕсенчен чылайăшĕ паянхи кун салтак тивĕçне тĕрлĕ çĕрте пурнăçлать. Вĕсене хавхалантарас шутпа ачасем открыткăсем яраççĕ, çырусем çыраççĕ. Шкул дирекцийĕ те çак ĕçе пысăк тимлĕх уйăрать, часть командирĕсене шкулта вĕренсе тухнă ачасем унта службăра тăни çинчен аса илтерсех тăрать, салам сăмахĕсем ярать.
Çак кунсенче çиччĕмĕшсем аякри Хакаси Республикинчи Абакан хулинчен çыру илчĕç. Ăна Антонов Алексей Леонидович салтак çырать. Вăл Чăваш Ишек каччи, Ыхра Çырми шкулĕнче пĕлÿ пухнă.
Ачасем çырăва ушкăнпа вуларĕç, сÿтсе яврĕç. Салтакăн çăмăлах мар, çапах та пурне те кăсăклантаракан саманчĕсемпе паллашрĕç, Алексейăн салам сăмахĕсем, ырă сĕнĕвĕсем пурин кăмăлне те кайрĕç. Уйрăмах çак шкулта хăйне вĕрентнĕ учительсене ырăпа аса илет, тав тăвать.
Çиччĕмĕшсем пĕр тăхтамасăр салтак патне хуравне те çырса ячĕç. Вĕсен ăшă сăмахĕсем Алексея савăнтарасса шанаççĕ.
С.КУЛАКОВА.