27 июня 2008 г.
Туçари ача садне çÿрекенсем музыкăпа спорт залĕнче черетлĕ занятинче пулнă хыççăн юнашарти кану пÿлĕмне кĕчĕç. Сывлăшĕ уçă кунта. Типĕтнĕ тĕрлĕ курăк шăрши кĕрет. Вĕсенчен хатĕрленĕ техĕмлĕ чее сыпкăм-сыпкăм ĕçрĕç ачасем. Çак хушăра Л.Машина медицина сестри курăксенчен мĕнле витаминсем тунине каласа пачĕ. Пĕр вăхăт шăп тăнă ушкăн шавласа тепĕр пÿлĕме куçрĕ.
Ача садне кĕрсенех юмах тĕнчине лекнĕн туятăн. Кашни пÿлĕмрех Л.Машинăпа А.Сабаева ăсталанă ÿкерчĕксем. 25 çул ĕçлет Лариса Мининовна çитĕнекен ăрупа. Тулăра вĕренсе тухнă хыççăн пикеннĕ вăл çак ĕçе. Маларах воспитательре ĕçленĕ. Каярах медсестра тивĕçĕсене пурнăçлама пуçăннă.
– Ачасемпе ĕçлеме килĕштеретĕп. Маншăн вăл – чун уççи. Вĕсене сывă та тĕреклĕ çитĕнтересси, çĕр-шыва юрăхлă çын пулма вĕрентесси – пирĕн тĕп тивĕç. Ачасем ÿснĕ май пултарулăх енчен аталанса пынине курса тăни маншăн чăн-чăн телей, – тет сăпайлăн Лариса. Калаçăвĕнче ырă кăмăлĕ, ăшă кулли, чун çирĕплĕхĕ, çепĕç сасси палăрать. Хăйне килĕшÿллĕ тытать вăл. Чун-чĕрипе пуян. Ытти çын хуйхи-суйхине сисет, ăна самантрах пулăшма васкать. Ватăсемпе ватăлла, çамрăксемпе çамрăкла пулма пĕлет.
Ĕçре пултарулăхĕ, ял çинче хисепĕ пур Л.Машинăн. Туçа хĕрĕ Вăтаелне качча тухнă. Мăшăрĕпе ывăлпа хĕр çитĕнтерсе тĕнчен аслă çулĕ çине кăларнă.
Обществăлла пурнăçра хастар вăл. Лариса ертсе пынипе ача садĕнче тĕрлĕрен мероприяти кăсăклă та пуян содержаниллĕ иртет. Ашшĕ-амăш пухăвĕсенче хускатмалли ыйтусем тупăнсах тăраççĕ. Профком председателĕн тивĕçĕсене нумайранпа туса пырать. 10 çул ытла ялĕнчи суйлав комиссийĕн секретарьне сĕнеççĕ.
Канура та маттур Лариса. Культура çуртĕнче ирттернĕ асламăшсем конкурсĕнче (мăнукĕ çитĕнет) сумлă парнене тивĕçрĕ.
Тĕрлĕ бюллетень кăларать ача садĕнче медсестра. Сывлăха çирĕплетме май паракан занятисем ирттерет.
Хăйĕн ĕçне ытти службăсемпе килĕшÿре туса пырать Л.Машина. Районти тĕп больницăри И.Лекарева педиатр, санэпидстанци специалисчĕсем пулсах тăраççĕ ачасем патĕнче. Пурин те пĕр тĕллев-çке: çĕр-шыва юрăхлă çынсем ÿстересси.
А.АСТРАХАНЦЕВА.