02 июля 2008 г.
Пултаруллă, мал ĕмĕтлĕ çамрăксене хавхалантарасси – Чăваш Республикин патшалăх политикин пĕлтерĕшлĕ енĕсенчен пĕри. Вĕсенчен пĕри – Чăваш Республикин çамрăксен патшалăх премийĕ. Сумлă наградăна 1996 çулта пама пуçланă. Паянччен ăна 50 яшпа хĕр тивĕçнĕ.
Премин 2007 çулхи лауреачĕ пулма кăçал 40 çамрăк хăйсен ĕçĕсене конкурса тăратнă, 11-шĕ наука, техника тата производство, 13-шĕ вĕрентÿ, культурăпа ÿнер, 10-шĕ сывлăх сыхлавĕ, тăван тавралăха упрас, физкультурăпа спорт тытăмĕсемпе çыхăннă.
Кăçалхи лауреатсене ЧР Правительство çурчĕн пĕчĕк залĕнче чысларĕç. Савăнăçлă церемоние ЧР Президенчĕ Николай Федоров, министрсем, тĕрлĕ организаци представителĕсем, çамрăксем хутшăнчĕç.
Сумлă наградăна кăçал тăватă çамрăк тивĕçрĕ. Ăслăлăх, техника тата производство енĕпе ЧР Çамрăксен патшалăх премине “Химпром” АУОн наука тĕпчев центрĕн 2-мĕш лабораторийĕн кĕçĕн наука сотрудникĕ Надежда Петрова илчĕ. Тепĕр лауреат – Татьяна Михайлова – Çĕрпÿри М.В.Силантьев ячĕллĕ 1-мĕш шкулта акăлчан чĕлхи вĕрентет.
Чылай вулакан Любовь Чугунова ятне пĕлет. Вăл та – лауреат. Журналиста çамрăксен политикин ыйтăвĕсене çутатнăшăн премипе хавхалантарчĕç.
Сывлăх сыхлавĕ, тăван тавралăха упрас, физкультурăпа спорт тытăмĕ енĕпе Шупашкарти 1-мĕш больницăра ĕçлекен Татьяна Никонорова палăрчĕ.
Çĕнĕ лауреатсене ĕçтешĕсем, пĕлĕшĕсемпе тăванĕсем саламларĕç. Николай Федоров пикесене хăйĕн ятĕнчен çĕнĕрен те çĕнĕ ÿсĕмсем тума ăнăçу, юрату сунчĕ.