19 июля 2008 г.
Районти Акатуй-Сабантуйра ачасемпе çамрăксен спорт шкулĕ ăнăçлă ĕçлесе пырса пысăк çитĕнÿсем тунине палăртрĕç. Маунтинбайк енĕпе Раççей Кубокне çĕнсе илессишĕн А.Матвеев, О.Терентьева, Максимпа Надежда Емельяновсем, республикăри армспорт енĕпе пĕр хутчен çеç мар мала тухнă И.Моисеев, Ю.Калмыкова, В.Думилин, çавăн пекех йывăр атлетикăпа Д.Давыдов, чупассипе В.Думилин, ирĕклĕ майпа кĕрешессипе А.Лисицына, И.Тараков, И.Чабатов çитĕнÿсемпе савăнтарсах тăнине асăнчĕç. Ку ĕçре тренер-преподавательсен тÿпи калама çук пысăк. Çитĕнÿсем вĕсен ĕçне хак параççĕ те ĕнтĕ.
Çак кунсенче тепĕр савăнăçлă хыпар та илтме тÿр килчĕ. Ачасене физкультурăпа спорт енĕпе хушма пĕлÿ паракан учрежденисен Пĕтĕм Раççейри пиллĕкмĕш конкурсне пĕтĕмлетнĕ. Пĕрлех тренер-преподавательсен, педагогсен ĕçне хакланă. Патăрьелĕнчи ачасемпе çамрăксен спорт шкулĕн ĕçченĕ И.Алеев “Массовость” номинацинче палăрнă, армспорт енĕпе виççĕмĕш вырăна тивĕçнĕ. Çĕнтерÿçе вĕрентĕвĕн федераллă агентствин дипломĕпе наградăлаççĕ. Çакăн хыççăн Ильфак Фиркатович пурнăçĕпе ĕçĕ-хĕлне тата тĕплĕнрех тишкерес шухăш çуралчĕ. Тренер-преподаватель 2007-2008 вĕренÿ çулĕнче 25 вĕренекене пĕрремĕш спорт разрячĕллĕ тунă. 12-шĕ спорт мастерĕн кандидатне çитнĕ. Л.Ахсянова, А.Юсупов, М.Налиба Шупашкарти тренировкăсене çÿресе Раççей спорт мастерĕн нормативне тултарнă. Марат кĕрешсе Раççей шайĕнчи ăмăртура çĕнтерÿçĕ пулнă. А.Алеева алă вăй виçессипе çамрăксем хушшинче палăрнă. А.Якупов сылтăм алăпа вăй виçсе Раççей шайне тухса малти вырăна йышăннă. Кăçал М.Налиба, А.Алеев, А.Якупов, А.Алеева, В.Васильева, Р.Салихов, Л.Ахсянова, И.Кучатов республика çĕнтерÿçисем, чемпионĕсем пулнă. И.Алеев хăй те республика чемпионатĕнче вун виççĕмĕш хут çĕнтернĕ (ÿкерчĕкре). Вĕренекенĕсене ăмăртусене хутшăнса ырă тĕслĕх кăтартать. Пушă вăхăчĕ çукпа пĕрех тренерăн. Халĕ республикăри ăмăртусене хатĕрлентерет. Август уйăхĕнче ачасем Йошкар-Олана каяççĕ.
Караганда облаçĕнчи Джезказган хули çывăхĕнче çуралнă И.Алеев. Пуçламăш классене Кзыл Камышри шкула çÿренĕ. Вăтам пĕлÿ Патăрьелĕнчи пĕрремĕш шкулта илнĕ. Вуннăра чухнех ачасемпе çамрăксен спорт шкулĕн ирĕклĕ майпа кĕрешекенсен уйрăмне çырăннă. Алла аттестат илнĕ каччă Йошкар-Олари политехника институтне вĕренме кĕнĕ. Çар службине Литвара ирттернĕ. Самбопа кĕрешсе полк чемпионĕ пулнă. 1989 çултанпа тренер-преподавательре ĕçлет Ильфак Фиркатович. Хăйĕн пурнăçне спортпа çыхăнтарма ăна Ульяновскри пединститутра вĕренни те пулăшнă. 1994 çултанпа аслă преподавательре вăй хурать И.Алеев.
Спорт мастерĕн кандидачĕ, ирĕклĕ майпа кĕрешекенсен тата алă вăйĕ виçекенсен республика шайĕнчи судйи Ильфак Фиркатович. 5 хутчен Атăл тăрăхĕнчи халăхсен спорт фестивалĕн çĕнтерÿçи пулнă вăл. Кĕрешес, алă вăй виçес енĕпе Раççей ша-йĕнчи тĕрлĕ ăмăртура пĕр хутчен çеç мар малти вырăнсене йышăннă.
Спорт çемйи теме пулать Алеевсене. Алсу хĕрĕ, Арслан ывăлĕ, Резеда мăшăрĕ алă вăй виçессипе çитĕнÿсем тăваççĕ. Ывăлĕ кĕрешÿре те палăрать.
А.АСТРАХАНЦЕВА.