16 июля 2008 г.
Çĕнĕ Ахпÿртре Афганистанран çарсене илсе тухнăранпа 19 çул çитнине паллă турĕç. Çиччĕмĕш çул ĕнтĕ çак куна палăртса кунта хоккей турнирĕ иртет. Ăна В.Тукмакова халаллаççĕ. Владимир Федорович – “Хĕрлĕ Çăлтăр” орден кавалерĕ, çамрăклах пурнăçран уйрăлнăскер. Ырă йăлана пуçарса яраканĕ А.Ильин.
Турнира Шупашкарти “Торпедо” спорт обществин, Елчĕк тата Патăрьел район командисем хутшăнчĕç. Вăйăра “Торпедо” çĕнтерчĕ.
Çакăнтах асăну митингĕ иртрĕ. Афганецсене ял тăрăхĕн пуçлăхĕ В.Краснов, район пуçлăхĕ Н.Глухов, Чăваш Патшалăх Канашĕн депутачĕ В. Синеев, Па -тăрьелĕнчи çар комиссариачĕн представителĕ, республикăри инвалид-афганецсен обществин совечĕн председателĕ Г.Матвеев саламларĕç. В.Тукмаков амăшĕн аса илĕвĕсем чуна çÿçентерчĕç.
Республикăран 118 каччă вилнĕ, çухалнă Афганистанра. Ял тăрăхне кĕрекен Татмăшран çеç Виталийпе Геннадий Дюкинсем, Юрий Царев, Сергей Силюков унти вăрçă витĕр тухнă.
Турнир вăхăтĕнче шкул залĕнче “Паттăрлăх” урокĕ иртрĕ. Унта Афганистан вăрçине хутшăннă салтаксем пулчĕç. Ятарласа хатĕрленĕ стенда, тарăн шухăшлă, илемлĕ альбомсене пăхма кăмăллă.
Урокра республикăри инвалид-афганецсен обществин ертÿçи Г.Матвеев хăйсен ĕçĕ-хĕлĕпе паллаштарчĕ. Çар комиссариачĕн представителĕ, воин-афганецсем аса илĕвĕсене ачасене каласа пачĕç. Вĕренекенсем çĕр-шывăн чăн-чăн патриочĕсем пулма тупа турĕç.
В.УРУКОВ,
учитель-пенсионер.